Stimá amisc dla formaziun permanënta!

Stimá navigadûs de internet, dla gran rëi modiala dla comunicaziun virtuala!

"I tëmps se müda y nos se mudun impara" - Aladô de chësc vedl proverb á ince le Consëi de Formaziun dl Comun de Badia orü fá le vare por se mudé para cun i tëmps.
I mesums che la rëi de internet nes pita aldedaincö é dessigü ince dër interessanc por la formaziun permanënta di adulc y nes deura sö nöies poscibiltês d’aziun y de publicisaziun dles iniziatives formatives. Al paia zënz ater la möia da sfruté chëstes poscibiltês y da investí te chësc vers.

Cun le 2000, le nü milenn, s’á le Consëi de Formaziun porchël daurí a chëstes inovaziuns dla tecnología dla comunicaziun y insciö al monn intíer desmostran de tigní para cun i tëmps y les inovaziuns.

Da sëgn inant se presentará le Consëi de Formaziun nia ma tres i mesums tradizionai (stampa, foliec, mass-media) mo s’anuzará ince dl potenzial di sorvisc de internet por amplié y potenzié süa aziun tl ciamp dla formaziun.

I Ves pitarun da sëgn inant a chësta misciun dl WWW desvalîs sorvisc che nes gnará tres plü d’öga tl dagní:

• s’informè sön le Consëi de Formaziun (statuc, fins, ativité, uniuns, injins da imperstè fòra, poscibiltês da ciafè contribuc, ...)

• consulté le program de formaziun atual y atualisé y por chi che ne l’á nia sot man tla forma de papíer la poscibilté da le desciarié (download) jö tl format PDF che pormët spo da le stampè fòra a ciasa sön la stampanta avisa insciö sciöche al é stampè sön le jorantin
  
  
• platernè tres i vedli programs di agn passá che gnará da sëgn inant archiviá man man
  
  
• vignun podará invié comodamënter al Consëi de Formaziun propostes o critiches sön le program
  
  
• An podará plü inant ince platernè sön deplü plates olache porvarun da dè n’idea sön l’ativité fata documentan val’iniziativa interessanta
  
  
• les uniuns mëmber podará usufruí de deplü sorvisc por comuniché cun le Consëi de Formaziun te na mainíera scëmpla y comota
  
  
• ater ruvará dessigü ciamò laprò ...

Sciöche Consëi de Formaziun sperun de fá n vare inant cun chësta novité y dandadüt da Ves pité n miú sorvisc!

S’inconfortun da aldi val’ da Os porsura chëstes plates te internet y sön nosc program. Aspetun porchël che ciafunse Osc feedback!

Düt le bun sön Osc percurs de navigaziun tl mêr dla formaziun y informaziun virtuala!

De bi salüc,
por le Consëi de Formaziun

Edi Crazzolara