Cô él pa nasciü?

Ciünes é pa sües funziuns y finalitês?

Al é oramai salpü che te tëmps de gragn mudamënc´, sciöche chi dal dédaincö, vál debujëgn che vignun, ince la jënt fora dla scola, se müdes para al tëmp por ester bogn de capí y interpretè i tëmps da sëgn. Propi por chësc nasc la nezescité de na formaziun permanënta di gragn.

A livel provinzial vëgnel investí cotan tl ciamp dla formaziun permanënta di gragn. Üna na forma é l’istituziun de consëis de formaziun che vëgn sovenzioná dala provinzia aladô di abitanã che vir sön le teritore de competënza. Le compit prinzipal de chisc consëis é de programè y coordiné damí l’ativité de formaziun di adulc´ sön le teritore dl comun.

Por incentivé la formaziun permanënta di gragn él gnü metü in pé de genaro dl 1991 le Consëi de Formaziun dl Comun de Badia da dütes les uniuns dl comun de Badia sön interesciamënt dl Comun de Badia y dl dr. Edi Crazzolara da La Ila.

Le Consëi de Formaziun ciara de ativé y animé la creativité dles uniuns por bëgn de düc´ i zitadins.

La junta dl consëi, metüda adüm da 6 rapresentanc´ litá dales uniuns vigni trëi agn, s’abina por programè l'ativité de formaziun tla dërta funziun che la lege provinziala dl 83, nr. 41, stabilësc. Al coordinëia dandadüt les iniziatives culturales dles lies, implësc loces formatives y publicisëia dütes les ativitês tres n calënder de formaziun che vëgn fòra da d’aisciüda y da d’altonn. I contribuc´, che vëgn dandadüt dala provinzia, vëgn partîs sö anter les uniuns che damana dô n sostëgn, tla mosüra che l'ativité vá adüm cun l’ statut y i critêrs metüs dal consëi.